Next Time
By: Babawilly
- You know mi?
Go ask people
You wan try me eh?
Who you bi sef?
Me and you go wear di same bow tie today.
Na die!
- Na bottle you dey chop?
Na two head you get?
Abi na razor blade you dey wak?
I go beat you sotey
When you reach hospitu
Na post mortem go bi yua treatment
- If yua mama born you well
Cross dis line for ground
So you cross eh?
Juss wait make I loose shirt
People hold me o!
I fit kill person o!
- You don write yua will?
Hmmmm, If I tear you slap eh
You go see Oba in 3-D
When last you see yua blood sef?
Aniwe, no think am too much jare
I go remind you the colour soon.
- So you bi area boy eh?
Me eh, I bi first class regional boy
Dis mai forehead so
Na on top mai mama dey break palm kernel
Wo, na teeth I dey take open Odeku
As for Gulder
Na eye socket I dey use.
- Dem don kuk mi for village o
Bottle and knife
No one dey enta
You shoot me gun, na piss
I go piss bullet comot
Na one bone dey my right forearm
Di bobo I punch last Friday
Na tomorrow bi di burial
- Ah-ah, water for mai cloth
Wetin I dey do for ground?
Chai! See my teeth dey dance Ajasco for ground
So you wan fight eh?
O.K, prepare to die.
- Thank yua God
If dis people no beg mi
I for dislocate yua spirit from yua bodi
Next time I no go let you off laik dat
Next time na die!
© June 2001 - Babawilly
Guides